Opruimings werk is begin na die afgelope naweek se storm wat grootskaalse sakde in beide Kimberley en Delportshoop aangerig het. Wydverspreide elektrisiteitsonderbrekings is in verskeie dele van die stad ervaar toe weerlig substasies Vrydag getref het. Die geaffekteerde gebiede het Galeshewe, Homestead, Homevale, Colville, Homelite, Lethabo Park, Platfontein, Slangpark, Bloemanda, Transit Camp, Tswelelang en Roodepan ingesluit. Swaar reën en sterk winde het dakke in Delportshoop afgeskeur en infrastruktuur beskadig, terwyl huise deurdrenk was in verskeie dele van Galeshewe. Inwoners wat agter die Homevale-brandweerstasie woon se huise is oorstroom terwyl ‘n ontploffing by die HA Morris-substasie in Roodepan plaasgevind het nadat dit deur weerlig getref is. Pogings was Maandag aan die gang om krag na dele van Roodepan te herstel. ’n Nuwe stroombreker moes Sondag by die Galeshewe-substasie geïnstalleer word. Thabo Mothibi van die Sol Plaatje-munisipaliteit sê die ontploffings het groot skade aan elektriese infrastruktuur aangerig, terwyl modderige toestande toegang tot sekere terreine belemmer het. Die elektriese afdeling het deur die naweek onverpoosd gewerk om die kragtoevoer te herstel.

Journalist: Rodrick Titus
Email: roderick@radioriverside.co.za