VIOOLSDRIFT-BOER SE MOORDVERHOOR WORD IN DESEMBER HERVAT
Die moordverhoor van die 61-jarige lusernboer, Jacob Dawid Malan “Japie” Claassens, sal op 2 Desember in die Rondgaande Hooggeregshof in Upington voortgaan.
Claassens staan tereg op twee aanklagte van moord ná die skietvoorval op sy kleinhoewe naby Vioolsdrift op 31 Oktober 2023. Sy vriende, die 54-jarige prokureur Coenraad “Coenie” de Beer en die 56-jarige sakeman en proteaboer James Kriel, is tydens die voorval geskiet en het die volgende dag in ’n Upingtonse hospitaal aan hul beserings beswyk.
Claassens pleit onskuldig op die twee moordaanklagte. Hy het egter reeds skuldig gepleit op ’n afsonderlike aanklag van die onwettige besit van meer as 200 patrone.
Tydens die verhoor het ’n buurman, Johan Fribus, getuig dat Claassens hom ná die skietvoorval gevra het om hom na die polisiekantoor te neem. Claassens het hom glo tydens die rit meegedeel dat hy “mense geskiet” het.
Getuies het ook getuig dat hulle nie die skietery gehoor het nie, terwyl deskundige getuienis later op die toneel en tydens die lykskouings gelewer is.
Die verhoor is op versoek van die verdediging uitgestel sodat deskundige getuienis oor ’n video-opname voorberei kan word. Die staat het beswaar gemaak teen die toelating van die video sonder bewys van die oorspronklikheid en egtheid daarvan.
